Day 329 (2): Mistakes Made

Lahat tayo ay nagkakamali sa buhay. Marahil isa itong desisyon na di pinagisipan ng ayos, isang bagay na pinili mo, isang bagay na di mo kontrol at marami pang iba. Basta malinaw na lahat tayo ay nagkakamali. Pero may mga pagkakamali na kaya namang iwasan tulad ng hindi pag aaral sa exam, pagkuha ng pagkain na di naman sayo na nasa ref, o kaya ang isa sa mga pinakamalala, manloko ng kasintahan.

Gaano ba kahirap maging tapat? Isang simpleng tanong na naglalabas ng milyun milyong kaisipan. Kasi naman, isipin mo yun gaano kahirap magpasagot ng isang tao o kaya gaano katagal ang proseso na maging kayo hanggang sa maging legal tapos lolokohin mo lang? Parang lahat ba ng ginawa niyong alaala eh pampalipas oras lang at bored ka ng mga araw, buwan at taon na yun? Kasi kung mahal mo talaga ang tao alam mo na kahit sa isang pagkakamali mo lang ay pwede siyang mawala pero isinugal mo. Kung mahal mo talaga ang tao di mo ilalagay ang sarili mo sa posisyon na pwede siyang mawala sayo. 

Ayusin na lang naman sana ang mga bagay na ginagawa dahil kahit ang mga simpleng kilos sa maling pagkakataon ay nakakasakit na. Hindi madaling magpatawad pero hindi dahil alam mong patatawarin ka naman ay sasagarin mo ang pasensya niya. Ikaw din, baka dumating ang araw na iisipin mo na lang na sana mas tinrato mo pala siya ng ayos.